Mukabat sa P278.1 milyon ang kantidad sa interbensyon sa agrikultura nga gipang-apod-apod sa Department of Agriculture–Regional Field Office 10 kon DA-10 alang sa Salvacion Multipurpose Cooperative (SMC), Bukidnon Provincial Local Government Unit (PLGU), ug sa City Local Government Unit (CLGU) sa syudad sa Malaybalay.
Kini nagpadayag sa padayon nga paningkamot sa ahensya aron mapalig-on ang produksyon sa agrikultura ug mapauswag ang matag lugar sa Northern Mindanao.
Ang SMC sa Kadingilan, Bukidnon nakadawat usab og usa ka hauling truck nga nagkantidad og P2.625 milyon ilawom sa Corn Program.
Samtang, gihatagan usab og certificate of commitment ang PLGU Bukidnon alang sa 32,587 ka bag sa hybrid rice seeds nga nagkantidad og P156 milyon, 65,740 ka bag sa inorganic fertilizer nga nagkantidad og P82 milyon, ug 52,419 ka pack sa biofertilizers nga nagkantidad og P38 milyon ubos sa Rice Program.
Sa laing bahin, ang CLGU Malaybalay nakadawat usab og certificate of commitment alang sa Gulayan sa Bayan package nga nagkantidad og P100,000 ubos sa High Value Crops Development Program.