Malampusong nasakmit sa mga awtoridad ang mukabat sa P2,400 nga kantidad sa mga smuggled nga sigarilyo atol sa gikasang operasyon sa Sitio Cogo, Barangay Maca-opao, niadtong Pebrero 24, 2026, sa may alas-8:00 sa gabii.
Nasikop sa maong operasyon ang usa ka 64-anyos nga babaye nga tag-iya sa tindahan human makuhaan og mga produkto nga walay saktong government health warning ug napakyas sa pagpakita og mga legal nga dokumento atol sa gihimong beripikasyon.
Lakip sa mga nakumpiskang ebidensya ang duha ka ream nga sigarilyo nga nagkantidad og P1,600.00 ug dugang usa ka ream nga nagkantidad og P800.00, diin tanan walay saktong permiso.
Ang dinakpan uban ang mga nakumpiskang kontrabando gidala ug gitugyan ngadto sa Rural Health Unit sa Kalilangan alang sa saktong disposisyon.