Andam na ang P20 mil pesos nga accredited allowance alang sa mga miyembro sa Philhealth insurance. Matud ni Merlyn Ybañez, head sa Public Affairs Unit, Philippine Health Insurance Corporation Region 10, gipasabot niini nga ang “Philhealth gamot “ usa sa mga programa sa gobyerno adunay gigahin nga P20,000 nga allowance sa tanang miyembro nga benepisyaryo sa maong ahensya matag tuig.
Mamahimong ma-avail ang mga tambal sa bisan asang pharmacy alang sa mga out-patient individual nga nagkinahanglan og medikal nga atensyon apan dili kinhanglan muadto sa mga hospital.
Gipasabot usab sa opisyal ang mga lakang ug angayang buhaton sa mga miyembro nga buot makakuha sa maong benepisyo.
Dugang pa niini adunay 12 ka accredited drug stores na sa Bukidnon diin mamahimong makuha ang mga medisina nga gikinahanglan.
Hingpit usab nga gipaambit ni Ybañez nga usa gitutokan karon nga programa sa buhatan sa Philhealth mao ang YAKAP program human giaprubahan ang 2026 national budget diin usa ang sektor sa panglawas ang adunay dagkong kantidad nga gigahin sa pondo.