Mikabat na sa P162 milyon gikan sa Enero hangtod Agosto ning tuiga ang kantidad sa nakumpiska nga illegal nga droga sa Rehiyon.
Sa eksklusibong pakighinabi sa Bombo Radyo Malaybalay kang Pmaj. Joann Navarro, tigpamaba sa Police Regional Office 10, miluwat kini nga gikinahanglan ang mas hugot nga pagpasiugda sa operasyon batok sa illegal nga droga aron hingpit nga mapakunhod ang pagpayuhot sa illegal nga droga ug mapanalipdan ang katawhan gikan sa kadaot nga dala niini.
Dugang pa ni Navarro, nga dili lamang ang operasyon ang kinahanglan palig-onon, kundili lakip usab ang edukasyon ug pagpahibalo sa katawhan, hilabi na sa mga tulonghaan.
Matud ni Pmaj. Navarro, gisugyot ang pagpatuman og mga seminar, community forums, ug information campaigns aron mahatagan og klaro nga kasayuran ang kabatan-onan ug ilang pamilya kabahin sa peligro ug epekto sa droga sa kinabuhi ug kalambuan sa komunidad.
Giintensify usab ang monitoring sa mga high-value targets ug drug dens aron mas paspas nga matubag ug mapakgang ang illegal nga kalihukan sa rehiyon.
Sa laing bahin, gipahibalo niini nga ang enhance 911 system karon anaa na sa operational control sa DILG, nga naghatag og centralized ug dali nga pagresponde sa mga tawag sa tabang, bisan asa sa rehiyon, ug suportado kini sa PNP sa seguridad ug koordinasyon.
Giklaro usab sa otoridad nga bisan kinsa pwede makatawag, apan gipahimangnoan ang publiko nga likayan ang prank calls tungod kini mahimong magdala og silot ug legal nga sangputanan.