Gisusi na karon sa Department of Migrant Workers (DMW) ang kontrobersiyal nga pagpamalit og yuta nga nagkantidad og P1.4 bilyon diin wala matud pay pagtugot gikan sa board sa Overseas Workers Welfare Administration (OWWA).
Gikumpirma ni OWWA Administrator Patricia Caunan nga gisugdan na ang imbestigasyon aron matuman ang due process, diin giapil sa gitan-aw ang papel sa iyang gisundan nga si kanhi OWWA Administrator Arnell Ignacio.
Matud ni Caunan, ang yuta nga napalit gikatakdang pagatukuran og halfway house o dormitory-type nga puy-anan alang sa mga overseas Filipino workers (OFWs).
Gumikan niini, gipasalig ni Caunan nga magpahigayon sila og audit, mangayo og legal nga opinyon gikan sa Department of Justice, ug makig-alayon sa Commission on Audit (COA) aron masuta ang legalidad ug kaangayan sa maong transaksiyon.
Gipasiugda usab niini nga ang pondo sa OFWs ug sa gobyerno sagrado, isip timaan sa seryosong imbestigasyon.
Giklaro sab ni Caunan nga magpabiling intact ang trust fund sa mga migranteng trabahante, ug posible nga gigamit sa transaksiyon ang internal nga pondo sa ahensya.
Gibutyag usab niini ang mga personahe nga apil imbestigahan karon , lakip sa pagpasiugda sa imbestigasyon si Migrant Workers Secretary Hans Leo Cacdac nga mao ang mitutok sa isyu sukad pa niadtong miaging tuig isip chairman sa OWWA board.
Matud pa sa DMW, nataktak sa puwesto si former Adm. Ignacio human masayri ang pagpamalit sa yuta nga walay pagtugot sa board, usa ka proseso nga giingong kinahanglanon sa tanang kasabotan nga ipasulod sa OWWA.