Gipasar na sa Sangguniang Panlungsod sa Malaybalay ang usa ka bag-ong ordinansa nga nag-institutionalize sa mga Farm to Market Roads (FMR) sa dakbayan.
Kini ang gibutyag ni City Councilor Brian Nelson T. Flores, ang Chairman sa Committee on Public Works atol sa exclusibong pakighinabi niini sa Bombo Radyo nga tumong sa maong lakang nga mapalig-on ang koordinasyon sa nasudnong kagamhanan pinaagi sa Department of Agriculture. Tungod niini, mas dali na alang sa dakbayan ang pag-download og pundo para sa konstruksyon, pagsemento ug pagmentinar sa mga dalan paingon sa mga kaumahan.
Gipasabot ni Flores nga gikinahanglan ang maong ordinansa aron mahatagan og prayoridad ang imprastraktura nga makatabang sa pagpalambo sa panginabuhian sa mga mag-uuma. Ang maong proyekto nakatutok karon sa mga dapit sa Basakan Area, Upper Pulangi, Dalwangan, ug Patpat.
Gawas sa imprastraktura, gidayeg usab ni Flores ang mga inisyatiba ni Councilor Alan Ryan Legaspi kalabot sa mga livelihood programs ug uban pang suporta alang sa sektor sa agrikultura ug pangisda sa dakbayan.