Gipahayag ni Ombudsman Jesus Crispin “Boying” Remulla nga likayan na niya ang paghatag og espesipikong mga petsa kalabot sa pagsang-at og mga kaso batok sa mga indibidwal nga nalambigit sa giingong anomaliya sa flood control projects sa nasod.
Kini human gipanghimakak ni Remulla ang pangangkon ni Senadora Imee Marcos nga duna nay nakatakdang pagsang-at og kaso karong Enero 15 batok sa pipila ka mga mambabalaod. Matud sa Ombudsman, wala siya masayod kung diin gikan ang maong impormasyon ug dili siya gusto nga maghatag og mga pasalig o “commitments” sa bisan unsang petsa aron malikayan ang sayop nga interpretasyon sa publiko.
Dugang pa ni Remulla, nakakat-on na siya og leksyon gikan sa nangaging mga pahayag diin wala matuman ang gilaumang petsa sa pagkapriso sa mga sad-an. Bisan pa niini, gipaniguro sa Ombudsman nga nagpadayon ang ilang trabaho sa Office of the Ombudsman ug sa Department of Justice (DOJ) aron manubag ang mga “big fish” o ang mga dagkong opisyal nga nalambigit sa maong kickback scheme.
Sa pagkakaron, duna nay duha ka batch sa mga kaso ang nasang-at kalabot sa flood control scam, lakip na ang batok ni kanhi Rep. Zaldy Co ug uban pang mga opisyal sa DPWH.
Nagpadayon usab ang ilang pagpaningkamot nga mokuha og dugang mga abogado karong tuiga aron paspasan ang paglihok sa mga kaso.