Gipasalig sa Office of the Ombudsman nga andam silang mopagawas sa kopya sa SALN o Statement of Assets, Liabilities and Net Worth ni Vice President Sara Duterte.
Sumala kang Assistant Ombudsman Mico Clavano, siguradong nga mahatag kini sa Kongreso subay sa subpoena nga gi-isyu sa House of Representatives Committee on Justice.
Sa nagpadayon nga pagdungog sa proseso sa impeachment batok sa Ikaduhang Pangulo, nagkasabot ang komite nga ipasumite sa Ombudsman ang kopya sa iyang SALN.
Base sa botohan sa House Justice Panel, buot nilang ipahatag ang mga kopya sa SALN sa mga tuig 2007-2013, 2016-2022, ug 2022-2024—mga panahong mayor pa kini sa Davao City ug karon isip bise presidente.
Tungod niini, gipasalig sa Ombudsman nga ilang tumanon ang responsibilidad nga mosunod sa balaod.
Gipasabot usab ni Clavano nga dili lamang ang kasamtangang SALN ang ilang isumite, kundili lakip usab ang mga dokumento gikan pa sa iyang panahon isip mayor.
Matod pa ni Clavano, ilang iendorso ang hangyo sa Kongreso ngadto sa angay nga opisina nga nagbantay sa maong mga dokumento, ilabina sa Mindanao Office sa Ombudsman.
Gipaambit usab sa opisyal nga ilang ginamonitor ang mga panghitabo, lakip ang pagdungog sa impeachment sa Kongreso.
Importante, matod nila, ang maong pagsubay tungod kay kabahin kini sa ilang konsiderasyon sa mga reklamong gisang-at batok sa Ikaduhang Pangulo.