Padayon nga gibantayan sa mga otoridad ang posibleng epekto sa Severe Tropical Storm Uwan sa Northern Mindanao, bisan pa man nga kasamtangang wala kini direkta nga epekto sa rehiyon, sumala sa pinakabag-ong update sa PAG-ASA.
Sa eklusibong pakighinabi sa Bombo Radyo Malaybalay kang Antonio Sugarol, Office of the Civil Defense-Region-X, gibutyag niini nga hugot na nga nagpahigayon og Pre-Disaster Risk Assessment (PDRA) meeting aron masiguro ang kaandam ug pagkoordinar sa tanang lokal nga kagamhanan ug ahensya sa rehiyon.
Matud niini, base sa weather bulletin sa PAGASA, posible nga makasinati ang pipila ka bahin sa Northern Mindanao og posibleng makasinati og landslide tungod sa ulan nga dala ni Bagyong Uwan ug sa shear line nga nakaapekto sa kasadpang bahin sa Mindanao.
Gisiguro usab sa OCD-10, nga magpadayon sa 24-oras nga monitoring, pagpahimutang sa mga evacuation centers, ug pag-andam sa relief goods, medical teams, ug response units alang sa dali nga pagresponde.
Sa pagkakaron, wala pa’y direkta nga epekto si Bagyong “Uwan” sa Northern Mindanao, apan padayon ang pagpangandam sa mga otoridad aron masiguro ang kaluwasan sa publiko ug ang hapsay nga pagpatuman sa mga pre-emptive measure kung gikinahanglan.