Taliwala sa problema sa livestock industry sa pipila ka bahin sa Mindanao, nagpabiling lig-on ang supply sa mga produkto sa hayop sa Northern Mindanao.
Sa eksklusibong pakighinabi sa Bombo Radyo Malaybalay kang Jose Apollo Pacamalan, Regional Executive Director sa Department of Agriculture X (DA-10), iyang gipadayag nga bastante ang supply sa poultry products sa rehiyon ug padayon ang ilang monitoring sa tanang probinsya sa Northern Mindanao.
Gipasiugda usab sa ahensya ang hugot nga pagpangbantay sa mga utlanan sa rehiyon, ilabi na ang istrikto nga pagpangpatuman sa swine quarantine protocols, aron malikayan ang pagsulod sa mga balatian sa baboy, sama sa ASF (African Swine Fever).
Dugang pa ni Pacamalan, nag-andam na og mga estratehiya ang DA-10 aron masiguro ang kasigurohan sa supply sa karne sa umaabot. Usa sa mga alternatibong solusyon nga ilang gihikay mao ang paggamit sa mga “picking ducks” o pato isip substitute meat kung adunay problema sa supply sa baboy ug manok.