Naputol ang damgo sa boxing legend nga si Nonito “The Filipino Flash” Donaire Jr. nga makakuha og laing higayon alang sa world title human siya gipildi sa batan-ong Japanese fighter nga si Riku Masuda pinaagi sa 8th-round Technical Knockout (TKO) niadtong Domingo sa gabii, Marso 15, 2026.
Ang maong away, nga usa ka WBA bantamweight title eliminator, gipahunong sa corner ni Donaire sa ika-walo nga round human nakita nga dili na makapugong sa sunod-sunod nga sumbag ni Masuda ang 43-anyos nga boksingero.
Bisan pa sa iyang kasinatian, nabug-atan si Donaire sa presyur sa 28-anyos nga si Masuda. Sa ika-pito nga round, nakatilaw og knockdown ang “Filipino Flash” human maigo og kusog nga “straight left” gikan sa Japanese fighter. Bisan pa nakabarog si Donaire, nagpadayon ang pag-atake ni Masuda pag-abot sa sunod nga round, nga maoy hinungdan nga gilabay na lang sa iyang mga coach ang tualya (threw in the towel) aron malikayan ang dugang pang kadaot sa boksingero.
Kini ang ikaduhang sunod-sunod nga kapildihan ni Donaire, kinsa mitala na karon og 43-10 win-loss record. Si Masuda, sa laing bahin, mas gipalig-on ang iyang record nga 10-1 uban ang siyam ka knockouts. Tungod niini nga kadaogan, si Masuda na ang mahimong mandatory challenger alang sa WBA bantamweight champion nga si Seiya Tsutsumi.
Ang maong sangka giisip sa daghang eksperto nga posibleng katapusan na sa maalamat nga karera ni Donaire sa boxing ring human sa kapin 25 ka tuig nga pagserbisyo sa maong paugnat sa kusog.