Giatubang karun sa DepEd Region 10 ang dagkong hagit sa kalay-on sa sports venues ug paghan-ay sa puy-anan sa mga atleta sa NMRAA 2026 nga gipahigayon sa Bukidnon.
Sa pakighinabi sa Bombo Radyo Malaybalay kay DepEd Region 10 Director Arturo Bayocot, usa sa mga pinaka-dako nga hagit ang pagdala sa mga atleta sa nagkalain-laing venue samtang masiguro ang ilang kaharuhay ug seguridad sulod sa tibuok semana sa kompetisyon.
Ang mga billeting schools andam sa pag-accommodate sa mga atleta, samtang ang ubang lungsod sama sa Quezon ug Kibawe mopahigayon sa swimming ug uban pang sports tungod sa angay nga pasilidad sa maong lugar.
Samtang pormal nga gisugdan kagahapong adlawa sa Department of Education (DepEd) Region 10 ang Northern Mindanao Regional Athletics Association (NMRAA) 2026 sa Bukidnon, nga nagpakita sa kahimtang sa probinsya isip bag-ong sentro sa sports sa rehiyon.
Matod ni Director Arturo Bayocot, resulta kini sa panagtinabangay sa probinsya sa Bukidnon ug sa mga dakbayan sa Valencia ug Malaybalay, kauban ang Regional Technical Working Group, aron masiguro ang hapsay nga preparasyon sa maong kalihokan.
Gipasigarbo usab niya ang world-class nga sports facilities sa Bukidnon, nga sa unang higayon maoy nag-host sa NMRAA ug giila pa isip potential national training venue sa Philippine Sports Commission.