Gipadayag sa prosecution sa International Criminal Court (ICC) nga ang paggamit sa pulong nga “neutralization” sa drug war operations ubos sa administrasyon ni kanhi Presidente Rodrigo Duterte katumbas sa direktang pagpamatay, dili lamang pagdakop—usa ka alegasyon nga mahimong magpalig-on sa kasong crimes against humanity batok kaniya.
Atol sa confirmation of charges hearing niadtong Martes, Pebrero 24, nagpresentar ang prosecution og mga video nga nagpakita sa mga pamahayag sa kanhing pangulo nga giingong nagdasig o nagmando sa pagpatay sa mga nalambigit sa ilegal nga droga. Gihisgutan usab ang kontrobersyal nga “narco-list” nga, sumala sa mga piskal, nahimong “hit list” diin ang mga nanganlan gipangtarget sa operasyon sa pulis ug sa mga vigilante.
Matud ni ICC Trial Lawyer Edward Jeremy, ang mga ebidensya nagpakita nga adunay sistemado ug organisadong polisiya sa pagpamatay nga naggikan mismo sa pinakataas nga lebel sa gobyerno.