Pormal nang nanumpa si Balendra Shah, usa ka sikat nga rapper ug engineer, isip labing batan-ong Prime Minister sa kasaysayan sa Nepal niadtong Biyernes, Marso 27, 2026.
Si Shah, nga mas nailhan sa iyang stage name nga “Balen,” nanumpa atubangan ni Presidente Ramchandra Paudel sa Sheetal Niwas (President’s House) sa Kathmandu. Sa edad nga 35, siya ang nahimong ika-47 nga Prime Minister sa nasod human ang iyang partido, ang Rastriya Swatantra Party (RSP), nakakuha og dakong kadaugan sa bag-o lang nahuman nga eleksyon.
Nailhan si Shah sa iyang signature nga itom nga sunglasses ug ang iyang pagka-outsider sa tradisyonal nga politika. Sa wala pa siya nahimong Prime Minister, nagsilbi una siya isip Mayor sa Kathmandu diin siya nahimong popular tungod sa iyang mga reporma batok sa korapsyon.
Ang pagsaka ni Shah sa gahum giisip nga usa ka “historic shift” sa Nepal, ilabi na nga siya ang unang lider gikan sa komunidad sa Madheshi nga nakalingkod sa pinakataas nga executive post sa nasod.
Nakuha sa iyang partido ang 182 ka mga lingkuranan gikan sa kinatibuk-ang 275 sa House of Representatives, nga nagpukan sa mga karaan ug dagkong partido politikal sa Nepal.
Gawas sa iyang pagpanumpa, nagpagawas usab si Shah og usa ka bag-ong rap song nga giulohan og “Jay Mahakaali” sa wala pa ang seremonyas, nga naghisgot sa panaghiusa sa mga taga-Nepal.