Gihimakak sa Department of Justice (DOJ) ang mga taho nga gidid-an ang National Bureau of Investigation (NBI) sa pag-apil sa manhunt operations batok sa negosyanteng si Charlie “Atong” Ang.
Matud ni Justice Secretary Officer in Charge Frederick Vida, walay kamatuoran ang migawas nga impormasyon nga wala na gilakip ang maong ahensya sa pagpangita kang Ang. Giklaro ni Vida nga ang pag-isyu sa warrant of arrest gikan sa korte mando alang sa tanang law enforcement agencies, lakip na ang NBI.
Gipangunahan usab sa kalihim ang kooperasyon tali sa nagkalain-laing ahensya sa gobyerno, sama sa Philippine National Police (PNP) ug NBI, aron masiguro ang dinaliang pagdakop sa maong pugante.
Samtang giangkon ni Vida nga sensitibo ang maong operasyon tungod sa kapasidad ug resources sa mga gipangita iyang gihimakak nga adunay “leak” sa impormasyon gikan kanila.
Si Atong Ang giisyuhan na og arrest warrant sa Regional Trial Courts sa Lipa, Batangas ug Santa Cruz, Laguna.
Nag-atubang kini og mga kasong kidnapping with homicide ug kidnapping with serious illegal detention nga adunay kalambigitan sa pagkamatay sa pipila ka mga sabungero.