Nagsaad si National Bureau of Investigation (NBI) Director Melvin Matibag nga motambong sa impeachment hearing sa House Justice Committee batok kang Vice President Sara Duterte nga gikatakda sa Abril 14.
Una kining giimbitar sa komite, ug gipahamtang og subpoena ang mga record sa imbestigasyon may kalabotan sa mga alegasyon nga pagpanamastamas ni VP Sara batok nila Presidente Ferdinand Marcos Jr., First Lady Liza Araneta-Marcos, ug sa kanhing House Speaker Martin Romualdez.
Sumala ni Matibag, andam kini nga isumite sa House Committee on Justice ang tanang dokumento nga gipangayo, lakip na ang certified true copies sa mga record sa imbestigasyon.
Base sa una nga report sa NBI, nirekomenda ang ahensya sa Department of Justice nga kasuhan si VP Sara sa grave threats ug inciting to sedition.
Ang imbestigasyon gisugdan pa niadtong panahon nga si Judge Jaime Santiago ang NBI chief, sa wala pa kini napulihan ni Matibag.
Gawas kang Matibag, lima pa ka tawo ang giingong gipatawag sa House panel aron maghatag og pamahayag, lakip na si Atty. Michael Poa, usa sa mga abogado sa depensa ni VP Sara.