Gikustodiya na karon sa Malaybalay City Police Station ang drayber sa multicab nga nakabangga sa tulo ka motorsiklo ug nakaangol sa duha ka bata sa Aglayan, Malaybalay City, alas 5 sa hapon, kagahapong adlawa.
Dali-daling gidala sa balay tambalanan ang duha ka bata human sila makabaton og mga pangos sa lawas. Ang multicab nahagbong sa kanal, kauban ang 3 sa mga motorsiklo nga nalambigit sa insidente, diin ang usa niini giingong gipanag-iyahan sa usa ka pulis.
Gikaingong lango sa ilimnong makahubog ang drayber ug misulay pa kini og ikyas human sa insidente, apan naapsan sa pulis nga mao usab ang tag-iya sa usa sa nabangga nga motorsiklo.
Gitaho nga ang suspetsado usa ka trabahante sa poultry ug kasamtangang anaa sa kustodiya sa Malaybalay City Police Station samtang padayon ang imbestigasyon aron masuta ang tibuok detalye sa aksidente.