Gisiguro ni House Deputy Minority Leader ug Mamamayang Liberal (ML) Partylist Rep. Leila de Lima ang tibuok suporta sa minorya sa Kamara sa pagmugna sa Joint Congressional Oversight Committee on Public Expenditures.
Kini nga komite maoy magbantay sa paggasto sa 2026 National Budget.Matud ni De Lima, bisan og gi-ukay ug gisusi nila og maayo ang 2026 budget dili gihapon angay nga mukumpiyansa nga kini gawasnon na sa korapsyon.
Gihatagan og gibug-aton ni De Lima nga anaa gihapon ang unprogrammed appropriations o ang gitawag nga “shadow pork” sa National budget karong tuiga. Matud pa niini, nidako usab ang “soft pork” nga daling magamit sa “patronage politics.”
Punto pa sa representante, wala pa gihapoy dagkong personalidad nga napriso tungod sa grabeng korapsyon sa pondo sa katawhan hinungdan nga anaa pa gihapon sila ug ang ilang mga kaalyado.
Gawas sa oversight committee, gipasiugdahan usab ni De Lima ang kamahinungdanon sa pagpasar sa Citizen Access and Disclosure of Expenditures for National Accountability (CADENA) Act.Dugang pa niini nga dako og ikatabang ang CADENA Bill tungod kay nagtakda kini og digital budget portal.
Pinaagi niini, mahimong bukas sa publiko ang tanang detalye sa matag paggasto sa gobyerno.