Nadiskobrehan sa kabukiran sa Taiwan ang usa ka suba nga dili tinuod nga tubig ang nagdagayday, kondili gilangkuban sa daghang labod nga gitawag karon og “Millipede River.”
Nasuta kini sa tour guide nga si Yang Xiaozhong, kinsa sulod sa 11 ka tuig nagtrabaho sa maong lugar ug nakabantay nga ang dalan nga iyang naagian murag natabunan sa daghang dahon.
Pagduol niya sa lugar, iyang namatikdan nga ang “suba” diay gihimo sa nagalihok nga millipedes, nga naglihok sa parehas nga direksyon.
Sa layo, mura kini’g tinuod nga suba. Ang gilapdon niini miabot sa upat ka metro samtang ang gitas-on sobra sa 50 ka metro, nga makahatag og kahadlok sa mga makakita niini.
Pagkakuha sa video ug pagpakaylap niini sa social media, daghang tawo ang nangutana sa parke kung normal ba kini o timaan sa kalit nga linog.
Ang parke nagpahibalo nga kini usa lamang ka natural nga panghitabo tungod sa mga pagbag-o sa klima ug palibot, ug nangayo og pasaylo sa kasamok ug kalibog nga nahimo sa publiko.