Nanghinaut ang mga trabahante sa Agrinanas Devt Corp nga mabayran sila sa kompanya sumala sa saad sa kompanya nga swelduhan magsugod sa ika-20 ning buwana hangtud sa sunod bulan sa Setyembre.
Sa pakighinbi ngadto sa Bombo Radyo Malaybalay kang Anthony Hingking, kanhi Union President sa Agrinanas Devt Corp, gipasalig sa kompanya ang pagbayad sa mga trabahante sulod sa maong petsa.
Gihisgutan usab niya nga sulod sa 20 ka tuig sa serbisyo, napahimulosan nila ang tukmang mga benepisyo nga angay sa mga empleyado.Nakadungog usab sila og mga estorya nga posible nga i-take over sa sister company ang ilang kompanya.
Nanghinaut ang mga trabahante nga sila gihapon ang makapadayon ug madawat sa bag-ong management.Gipakita ni Hingking ang kahimtang sa mga trabahante nga nagpaabot sa kasiguruhan sa ilang trabaho ug bayad.
Sa laing bahin Matud pa ni Atty. Proculo Sarmen, usa ka legal expert, nga ang kompanya naka lapas sa Labor Code, partikular sa 30-day notice requirement, nga mahimong moabot og kapin sa P150 milyon nga obligasyon base sa maong gidaghanon sa mga apektadong empleyado.
Matud pa sa abogado, kinahanglan unang mopasaka ang kompanya og petisyon sa korte kabahin sa bankruptcy aron masuta kung tinuod ba kini. Gidudahan usab sa abogado, ang gikaingong bankruptcy diin gitimbang niini nga kung mao ang kahimtang sa kompanya adunay matud pay pagbaligya sa mga share imbis nga kalit nga hunongon ang operasyon.