Gipahayag ni kanhing Supreme Court Associate Justice Antonio Carpio nga mahimo gihapon dawaton ug gamiton sa korte ang testimonya sa mga self-confessed murderers isip lig-on nga ebidensiya.
Kini ang tubag ni Carpio sa kritisismo ni Atty. Nicholas Kaufman bahin sa paggamit sa maong mga testigo sa Office of the Prosecutor sa International Criminal Court (ICC).
Sumala ni Carpio, ang testimonya sa mga indibidwal nga adunay kriminal nga record mahimong dawaton sa korte basta adunay corroboration nga nagpamatuod sa ilang gisulti.
Gidala niya isip ehemplo si Edgar Matobato ug Arturo Lascañas, kanhing mga pulis ug miyembro sa kontrobersyal nga Davao Death Squad (DDS), nga duol sa sistema sa grupo ug adunay igong kahibalo sa ilang operasyon sa panahon sa drug war.
Gipasabot usab ni Carpio, nga adunay testimonya gikan kang Royina Garma, kanhing general manager sa Philippine Charity Sweepstakes Office, nga adunay lawom nga kahibalo sa reward system nga gipadagan sa administrasyon ni Duterte sa panahon sa drug war.
Sumala ni Carpio, makapamatood kini sa mga pahayag sa kanhing Pangulo, lakip na ang iyang testimonya sa House ug Senate hearings, ug kini mahimong ebidensiya nga madawat sa korte.