Nagpahimangno ang Police Regional Office 10 (PRO-10) sa tanang personahe sa kapulisan sa rehiyon nga likayan ang iresponsableng pagpabuto sa armas karong panahon sa Pasko ug Bag-ong Tuig.
Sa pakighinabi sa Bombo Radyo Malaybalay kay PMaj. Joann Navarro, tigpamaba sa PRO-10, iyang gipahibalo nga walay pasaylo ug taktakon sa serbisyo ang bisan kinsang pulis nga masakpang magpabuto og armas nga walay igong rason
Bisan wala na gihimo ang “nozzle taping,” gipakusgan sa PNP ang disiplina ug monitoring aron makab-ot ang “zero stray bullet incident” sa tibuok rehiyon.
Dugang pa niini, gipahibalo usab sa maong buhatan nga nagpabiling malinawon ang pagsaulog sa Misa de Gallo ug Simbang Gabi sa tibuok rehiyon ug walay natala nga bisan unsang hulga sa seguridad.
Bisan pa man niini, nagpabilin sa heightened alert status ang kapulisan hilabi na sa mga terminal sa bus, pantalan, ug mga tourist destinations tungod sa pagdagsa sa mga biyahero.
Samtang walay namatikdan nga aktibong criminal gang sa sulod sa rehiyon, gipahugtan gihapon ang intelligence monitoring ug checkpoint operations aron masiguro nga walay dautang grupo gikan sa ubang dapit nga makasulod ug makabalda sa kalinaw sa selebrasyon.