Pwede na makakuha ang mga Pilipino og mga importanteng dokumento sa civil registry sa digital nga paagi human gilusad sa Philippine Statistics Authority ang e-certificate kagahapong adlawa.
Pinaagi sa PSAHelpline.ph, tugutan na ang digital service ug pwede na makapangayo og e-certificates nga adunay pareha nga legal authority sama sa tradisyonal nga PSA-issued certificates.
Lakip sa mga digital nga dokumento nga pwede i-request ug ma-verify mao ang birth certificate, marriage certificate ug death certificate, lakip na ang Certificate of No Marriage o CENOMAR.
Matud sa PSA, kini nga serbisyo usa ka “cryptographically secure,” nga nagpasabot nga kini adunay hugot nga seguridad ug gidisenyo para sa real-time nga beripikasyon.
Niadtong 2023, ang susama nga serbisyo gisuwayan usab sa tabang sa Armed Forces of the Philippines Pension and Gratuity Management Center ug sa Department of Foreign Affairs.
Niabot sa kapin 200,000 ka mga transaksyon ang naproseso sa maong pilot-run nga naghatag og kumpiyansa sa PSA nga andam na kini nga ilusad sa publiko.