Gisuportahan ni Agriculture Secretary Francisco Tiu Laurel Jr. ang pagduso sa House Bill 2260 ni Albay 3rd District Representative Adrian Salceda.
Ang maong balaudnon nagtumong sa pagpalig-on pa sa kasamtangang pagpatuman sa Coconut Farmers and Industry Trust Fund Act, nga nailhan usab nga coco levy fund law.
Dugang pa niini, gitumong usab sa maong balaudnon nga mapadali ang proseso sa pagpagawas sa gikinahanglang pundo alang sa kaayohan sa mga mag-uuma sa lubi sa tibuok nasud.
Sa pamahayag niini, giawhag ni Secretary Laurel ang Kongreso sa pag-aprobar sa House Bill 2260 sa labing dali nga panahon.
Ang panawagan niini nagpunting sa panginahanglan nga dili usikan kining importanteng kahigayonan sa pagtabang sa mga mag-uuma sa lubi, hilabi na sa kahimtang karon diin taas ang presyo sa lubi sa kalibotanong merkado.
Nagtuo si Secretary Laurel nga ang hinanaling pag-aprobar sa maong balaudnon makatabang sa mga mag-uuma sa lubi nga makapahimulos sa kasamtangang maayo nga presyo sa lubi sa merkado.
Matud ni Representative Salceda, importante nga ipadayon ug mapadali ang pagpagawas sa coco levy funds tungod nagdepende niini ang panginabuhian sa daghang komunidad sa kabaryohan nga nagsalig sa industriya sa lubi.