Padayon ang pagsaka sa kaso sa sexual abuse sa rehiyon 10 diin kadaghanan sa mga insidente nahitabo mismo sulod sa panimalay,Sa exclusibong paghinabi kay Pmaj Joanne Navarro, Tigpamaba sa PNP Region 10. gibutyag niini nga mga kabataan ang sagad sa mga biktima diin kaugalingong mga paryente o kadugo maoy gahimo sa krimin.
Gikonsiderar kini nga usa ka seryoso nga problema nga kinahanglan tutukan sa komunidad, ilabi na sa mga ginikanan.Hinungdan nga gidasig ni Navarro ang publiko nga magbantay sa mga kabag-ohan sa pamatasan sa ilang mga anak ug kumustahon kini kanunay, aron masayran dayon kung adunay problema.
Gidugang usab niya nga dako ang papel sa mga tunghaan sa pagmonitor ug pagpangga sa mga kabataan. Sa pagkakaron, ang kapulisan nagpatuman na sa mga aktibidaidis lakip na sa awareness drives sa mga tunghaan aron mapalapdan ang kasayuran kabahin sa sexual abuse ug sa hustong pamaagi sa pag-report niini.
Gi-awhag usab ni Navarro ang tanang biktima sa pagpang-abuso nga dili mahadlok sa pagsumbong sa kapulisan, aron maprotektahan ug matabangan sila sa hustong paagi.