Gipahigayon karong adlawa ang seremonya sa paghatag sa Safe Conduct Pass (SCP) alang sa mga kanhing mga rebelde kon FR nga nag-aplikar ubos sa Amnesty Program nga gipasiugdahan sa 403rd Infantry “Peacemaker” Brigade.
Ang kalihokan nagtimaan sa dakong lakang sa kabag-ohan ug pagdawat balik sa sabakan sa balaod ug komunidad.
Sa pakighinabi sa Bombo Radyo Malaybalay kang Col. Warren C. Munda, Deputy Brigade Commander sa 403rd Infantry “Peacemaker” Brigade, miluwat kini nga ang SCP dili lamang dokumento apan usa kini ka simbolo sa pagsalig ug komitment sa gobyerno sa pagpanalipod ug pagtabang sa mga misurender.
Matud ni Col. Munda, ang SCP gihatag aron dili na mahadlok ang mga kanhing rebelde sa kapulisan o ubang law enforcement agencies taliwala sa mga kasong gikalambigiyan niini.
Samtang mipadayag usab si Alias “Loloy”, kanhi miyembro sa walhong grupo nga kapin 20 ka tuig nga nahilambigit sa kalihokan, nga dako iyang kalipay tungod hingpit na niininh nabati ang kagawasan ug oportunidad sa normal nga kinabuhi uban sa pamilya.
Gibutyag usab niini, nga nakadawat usab kini og pinansyal nga tabang ubos sa Enhanced Comprehensive Local Integration Program (E-CLIP) nga nagkantidad og P16,000, nga gigahin alang sa pagpanginabuhian ug pagpanguma.
Giawhag usab sa otoridad ang mga nahabiling miyembro sa walhong grupo nga mutahan na balik sa sabakan sa gobyerno ug mopili sa dalan sa kalinaw ug kalamboan.