Unom ka adlaw sa dili pa ang confirmation of charges hearing ni kanhi Presidente Rodrigo Duterte sa International Criminal Court (ICC) sa The Hague, Netherlands, nakadawat na og mga hulga ang delegasyon sa mga kabanay sa mga biktima gikan sa mga taga-suporta ni Duterte sa maong dapit. Matud ni Atty. Christina Conti, gipaabot usab nila ang pag-atake sa mga online trolls dungan sa pagdungog nga magsugod karong Pebrero 23.
Sa maong hearing, posibleng mopresentar ang prosekusyon og duha ka testigo nga dunay kalambigitan sa pagpatuman sa War on Drugs. Bisan pa man sa mga hungihong nga silang Edgar Matobato ug Royina Garma ang motestigo, sa adlaw pa sa hearing mahibaloan ang tinuod nga mga saksi.
Sa pagkakaron, anaa pa sa pre-trial stage ang kaso ug mahimo pang madugangan ang mga pasakaan og kaso human ginganlan ang walo ka mga giingong kauban ni Duterte, lakip na silang Senador Bato Dela Rosa ug Bong Go. Nagpadayon usab ang debate bahin sa pagpatuman sa arrest warrant sa nasud, diin gipaniguro sa Malacañang nga angay kining ipatuman ug atubangon sa mga akusado kon wala silay sala.