Gipaniguro karon sa Police Regional Office X nga luwas, malinawon ug walay dagkong insidente ang pagsaulog sa pag-abot sa bag-ong tuig sa tibuok rehiyon.
Sa eksklusibong pakighinabi sa Bombo Radyo Malaybalay kang Police Major Joann Navarro, tigpamaba sa PRO-X, gipadayag niini nga wala’y namonitor nga bisan unsang seryosong hulga sa siguridad nga mahimong makabalda sa kahusay ug kalinaw sa publiko atol sa selebrasyon.
Sumala pa kang PMaj. Navarro, wala usab naitala nga insidente nga adunay kalabutan sa pabuto o firecracker-related injuries, hilabi na tungod sa padayon nga pagpatuman sa kampanya batok sa paggamit ug pagbaligya sa mga ginadili nga pabuto.
Bisan pa niini, adunay gihimong mga operasyon nga miresulta sa pagkumpiska sa mga illegal nga pabuto sa pipila ka lugar, lakip na sa syudad sa Iligan, Barangay Poblacion sa Valencia City, ug pipila ka lugar sa Lanao del Norte.
Sa kinatibuk-an, adunay kapin sa 1,100 ka items sa mga ginadili nga pabuto ang nakumpiska nga gibanabanang mokabat sa kantidad nga P6,500.