Nakarekober ang Explosive Ordnance Disposal (EOD) sa Bukidnon og ubay-ubay nga mga eksplosibo ug bala gikan sa mga sibilyan human ang malampusong koordinasyon sa komunidad.
Sumala ni PSMS. Richard A. Memeje, kadaghanan niini mga unexploded ordnances gikan pa sa World War II ug kabilin sa mga beterano nga nakalutan o nadiskobrehan sa mga residente.
Gawas sa mga kabilin sa gubat, aduna usab mga eksplosibo nga nabilin sa mga beteranong sundalo sa ilang mga panimalay nga karon pa lamang nadiskobrehan sa ilang mga pamilya ug boluntaryong gitugyan ngadto sa mga awtoridad.
Hugot nga nagpahimangno ang kapulisan sa publiko kabahin sa seryosong silot nga atubangon sa bisan kinsa nga mohimo og “bomb joke” o pagpakaylap og sayop nga impormasyon bahin sa bomba.
Gipadayag sa opisyal, nga aktibo karon ang ilang grupo sa pagbisita sa mga pampublikong lugar aron mag-apod-apod og Information, Education, and Communication (IEC) materials.
Dugang pa niini nga ang mga eksplosibong kagamitan o armas pagabungkagon sa higayon nga magmugna og aktibidad ang Philippine Nation Police (PNP) og lakang sa pag-dispose sa maong mga delikadong kagamitan aron amalikayan ang kadaot o peligro nga posibleng dala niini sa katawhan.