Nabati ang kusog nga pagtay-og sa yuta sa dakbayan sa Malaybalay kagahapong adlawa human sa nahitabong 5.6 magnitude nga linog nga naggikan sa Manay, Davao Oriental. Tungod niini nag-deploy dayon ang City Disaster Risk Reduction and Management Office (CDRRMO) sa mga Rapid Damage and Needs Assessment (RDANA) teams aron sa pagmonitor sa mga barangay nga posibleng adunay mga kadaut o epekto sa maong linog.
Sa exklusibong pakighinabi sa Bombo Radyo Malaybalay kay Kenneth Amiel Taylor, Training and Logistics Division Head sa CDRRMO nga usa sa ilang gitutukan mao ang kalidad ug estruktura sa mga building nga posibleng naapektuhan sa kusog nga pagtay-og.
Dugang pa ni Taylor, adunay pipila ka mga estudyante sa usa ka unibersidad nga nakuyapan human sa kalit nga paglinog.
Subay niini giawhag sa CDRRMO ang mga residente sa syudad nga susihon ang ilang mga panimalay ug establisamento alang sa posibleng mga crack o damages ug dayon kining ireport sa ilang buhatan aron matabangan ug maimbestigahan dayon.
Ang mga awtoridad nagpadayon sa pagbantay ug pag assess sa mga lugar nga posibleng adunay epekto sa maong linog aron masiguro ang kaluwasan sa publiko.