Gidagsa sa mga meteorite hunters ang usa ka county sa Ohio human sa usa ka dakong fireball niadtong miaging semana, nga nagbilin og mga piraso sa bato gikan sa kalangitan.
Usa sa mga posibleng fragment nga nakaplagan pa sa driveway sa usa ka residente.
Sumala sa report, usa ka asteroid nga adunay sukod sa usa ka sakyanan ang mibuto sa kalangitan sa Northeast Ohio.
Sukad niadto, ang mga eksperto ug residente sa Medina County nagpadayon sa pagpangita sa mga nahabilin nga piraso sa meteorite. Sumala ni December Harris, lokal nga residente, nga usa ka piraso nga adunay kadako sa walnut ang posibleng nahulog duol sa ilang balay.
Samtang matud usab ni Ralph Harvey, propesor sa Case Western Reserve University, nga ang uban pang piraso adunay usab kadak-on sa usa ka grapefruit.
Usa usab ka estudyante sa grade-6 nga si Evan Waite, nakakita og 3-gram fragment sa likod sa Sharon Elementary School.
Samtang, nakakita ang iyang inahan usab niini og duha ka mas gagmay pang piraso. Gipahimangnoan sa Medina County Sheriff’s Office ang mga hunters nga respetohon ang pribadong yuta.
Aduna nay pipila ka reklamo bahin sa trespassing, apan wala pay narekord nga pag-aresto.