Usa ka talagsaong panghitabo ang nahitabo sa Scotland human napalgan ang usa ka “message in a bottle” nga naggikan pa sa layong bahin sa Canada.
Ang maong botelya napalgan ni Mike Scott samtang naglakaw-lakaw sa baybayon sa St. Cyrus, habagatang bahin sa Aberdeen, uban sa binuhing iro nga si Maggie.
Ang iro mismo ang nakamatikod sa botelya nga nabanlas sa balas, diin sa sulod niini adunay usa ka sulat nga giputos og plastik aron maprotektahan batok sa tubig-dagat.
Base sa sulod sa maong sulat, kini nasulat sa pinulongang Pranses ug gipetsahan niadtong Agosto 2024.
Giingong gihulog ang botelya gikan sa usa ka ferry nga nagbiyahe gikan sa Prince Edward Island paingon sa Îles-de-la-Madeleine sa Quebec, Canada.
Ang tag-iya sa sulat nailhan nga si Annie Chaisson, kinsa nagbilin og mensahe nga naghangyo sa bisan kinsa nga makakita niini nga kontakon kini pinaagi sa iyang Facebook account.
Tungod sa kakusog sa balod sa Dagat Atlantiko, naanod ang botelya sa liboan ka kilometro hangtod nga niabot kini sa baybayon sa Scotland human sa kapin usa ka tuig nga paglutaw-lutaw.