Patay ang usa ka menor de edad human kini nalumos sa usa ka resort sa lungsod sa Kibawe, Bukidnon, pasado alas-6:20 sa gabii niadtong milabayng adlaw.
Base sa imbestigasyon sa kapulisan, nasayran nga ang biktima naglangoy-langoy nga nag-inusara sa mabaw nga bahin sa swimming pool samtang ang iyang amahan ug ubang kabanay anaa sa mas lawom nga bahin. Matud sa amahan, nananghid ang bata nga moadto sa laing pool aron duna’y kuhaon, apan paglabay sa lima ka minuto, namatikdan na lamang nga wala na kini mibalik.
Sa dihang gipangita, nakit-an na lamang ang bata nga anaa na sa ilawom sa tubig. Dali kining gidala sa labing duol nga balay tambalanan diin gisuwayan pa og resuscitation sa mga medical staff, apan gideklarar kining dead on arrival sa doktor.
Tungod niini, hugot nga nagpahimangno ang mga otoridad ngadto sa mga ginikanan ug mga hamtong nga bantayang maayo ang mga bata atol sa paglangoy aron malikayan ang susamang trahedya, ilabina niining panahon sa bakasyon ug Semana Santa diin dagsa ang mga tawo sa mga resorts.