Nagtinguha si Quezon Mayor Pablo Lorenzo III nga mapadali ang paghimo sa detour road human ang nahitabong landslide sa Overview, Sitio Kipolot, Barangay Palacapao, Quezon, Bukidnon.
Tungod sa pagkahugno sa dalan daghang motorista ug residente ang nahasol kay dili na maagian ang maong ruta nga nagdugtong sa ubang mga lugar sa Bukidnon.
Matud pa sa alkalde, naapektuhan usab ang daghang mga negosyante nga nagagamit sa maong dalan isip agianan sa ilang negosyo ug biyahe sa produkto.
Gidugang ni Mayor Lorenzo nga dili lamang mga residente sa Bukidnon ang nakaangkon og kalisod kon dili apil usab ang mga negosyante gikan sa nagkalain-laing lugar nga kanunay nagalabay sa nasangpit nga kalsada.
Kasamtangan, padayon ang paningkamot sa lokal nga panggamhanan nga matukod dayon ang temporaryong dalan aron mabalik ang normal nga pagbiyahe sa lugar.