Gituboy si kanhi world champion Mark “Magnifico” Magsayo isip No. 1 contender sa WBC super featherweight division, sumala sa pinakabag-ong ranggo sa maong sanctioning body.
Tungod niini, si Magsayo na ang nag-unang challenger sa world title ni American boxer O’Shaquie Foster, nga posibleng iyang atubangon sa usa ka championship karong tuiga.
Misaka si Magsayo gikan sa No. 2 spot human niya ilampaso si Eduardo Hernandez sa Mexico.
Apil usab sa top contenders sila Michael Magnesi sa Italy ug Raymond Ford sa U.S.
Nagpabilin si Magsayo sa No. 3 ranking sa WBO, busa abri pa ang oportunidad alang sa usa ka title shot ubos sa lain nga organisasyon.
Ang 30-anyos nga lumad sa Bohol adunay record nga 28 ka kadaogan (18 pinaagi sa knockout) ug duha ka pildi.
Sukad misaka siya sa super featherweight, upat na ka sunod-sunod nga kadaogan ang iyang naangkon diin ang pinakabag-o nga nakontra niini batok kang Jorge Mata Cuellar niadtong Hulyo 19 sa Las Vegas.
Samtang si Foster, 31, adunay record nga 23-3 (12 knockouts) ug katapusan nga nakig-away niadtong miaging tuig aron mabawi pag-usab ang WBC title kontra kay Robson Conceição sa Brazil.