Gipanghimakak sa kapulisan ang nagkayamukat nga impormasyon nga ang nakumpiskang tanum nga marijuana kay nakuha kini likod sa Municipal Hall sa Impasugong, Bukidnon. Sa pakighinabi sa Bombo Radyo Malaybalay, giklaro ni PCPT. Shiela Joy Jangad, tigpamaba sa Bukidnon Police Provincial Office, nga ang operasyon gihimo sa Purok 9, Brgy. Poblacion, Impasugong, sa kabukiran dapit diin nakit-an ang tanum atol sa Anti-Illegal Drugs Operation niadtong milabayng adlaw.
Nakasibat matod pa ang duha ka suspek nga 40 anyos ug 32 anyos nga nailhan na sa otoridad. Gipanghimakak usab niini ang impormasyon nga ang nagtumbok sa presensya sa tanum mao ang ka live-in sa usa sa mga suspetsado. Alang sa kaluwasan, wala kini napamatud-an sa kapulisan.
Apan base sa nakalap nga impormasyon sa Bombo Radyo Malaybalay ug sa aktuwal nga pag-adto sa kapulisan sa lugar, adunay viral nga video nga nagpakita atol sa gihimong operasyon, na matod pa ni alyas Irene, gikulata kini sa iyang ka live-in, nga mitumbok usab nga nakita niya nga nagbulad og marijuana. Giingon pa niini nga nakabaligya kini og marijuana nga nagkantidad sa ₱30,000, apan wala kini maghatag kaniya ang maong ka live in, hinungdan nga siya maoy nagtudlo sa kapulisan.
Ang maong nakumpiska nga Marijuana mikabat kini sa ₱265,350 ang kantidad, naglangkob sa 122 ka tanum, 2,000 gramos nga uga nga dahon, 35 ka seedlings, 10 gramos nga marijuana seeds, usa ka improvised air gun, ug usa ka water container.
Giandam na ang kaso ubos sa Cultivation of Dangerous Drugs, samtang ang ebidensiya gidala sa Provincial Forensic Unit alang sa eksaminasyon ug hustong disposisyon.