Gikompirma nga si 8-division world champion Manny Pacquiao karon ang naggunit sa ika-9 nga pwesto sa welterweight ranking, base sa pinakabag-ong analysis sa The Ring, duha ka semana human sa iyang away batok kang Mario Barrios.
Bisan pa sa upat ka tuig nga pahulay human sa iyang pagretiro, dali nga mibalik ang pangalan ni Pacquiao sa ranking.
Gisundan niya ang iyang kontra nga si Barrios, nga anaa sa No. 8 nga pwesto.
Ang The Ring, nga giilang “bible of boxing,” kanunay nagpagawas og updated nga rankings sa mga boksingero sa tibuok kalibutan.
Sa maong listahan, nanguna ang undefeated welterweight fighter nga si Brian Norman, gisundan ni Eimantas Stanionis, ug ikatulo si Giovanni Santillan.
Matud sa The Ring, ang bagong ranking resulta sa panel discussion ug analysis sa tabang sa ilang Ratings Panel, nga gilangkuban sa mga eksperyensyado nga boxing journalists ug mga historian gikan sa lain-laing nasod.
Lakip sa gikonsidera sa paghimu sa rankings ang resulta sa mga duwa, performance sa matag boksingero, ug ilang mga track record.