Gikumpirma ni Department of Justice nga ‘submitted for resolution’ na ang reklamong ‘malversation’ nga giatubang ni kanhi Sen. Bong Revilla Jr.
Sigon kini ni Atty. Si Polo Martinez, ang tigpamaba sa nahisgutang departamento, atol sa pakighinabi kaniya kalabot sa maong reklamo.
Diin gikaingong i-review o tun-an sa prosekusyon ang dili pa pinal nga resolusyon aron matino kung unsa nga aksyon ang himuon sa maong reklamo.
Gipaambit pa sa tigpamaba nga ang nahisgutang ‘malversation case’ batok sa kanhi senador adunay kalambigitan sa anomalosong proyekto nga konektado sa kompanya nga SYMS Construction Trading.
Dugang niini, nga ang reklamo kabahin sa unang batch sa ‘lima ka kaso’ nga gisang-at sa Department of Justice.
Tulo niini ang kasamtangang ‘pending for release’ sumala pa ni Justice Spokesperson Atty. Martinez.
Samtang ‘pending review’ na ang ‘malversation complaint’ batok kang kanhi Senador Revilla.
Matud pa ni Justice Spokesperson Atty. Polo Martinez, nga kaniadtong Enero 12 ning tuiga, gipasa alang sa resolusyon ang kasong malversation batok sa kanhi mambabalaod.
Kalabot niini, gipaambit sa opisyal nga ang “timeline” nga gikonsiderar anaa sa 60 ka adlaw gikan sa pagpasaka sa reklamo sa dili pa kini hingpit nga iresolba sa prosekusyon.
Hinuon, giklaro sa tigpamaba nga ang mga kaso nga adunay kalambigitan sa kurapsyon sa flood control wala gipasa sa departamento sa susamang higayon.
Matud niini, nga tulo ka batch ang miabot sa Department of Justice nga nagkalain-lain ang oras ug petsa sa pagpasaka.
Nag-atubang karon og daghang reklamo ug kaso si kanhi Senador Bong Revilla Jr., dili lamang sa Department of Justice apan lakip na sa ubang mga korte.
Sa maong departamento, nag-atubang kini og mga reklamong malversation lakip na ang kasong plunder tungod sa gikaingong pagkalambigit niini sa kurapsyon sa flood control.
Sa pagkakaron, anaa kini sa kustodiya sa Bureau of Jail Management and Penology ug nakakustodiya sa New Quezon City Jail sa Payatas, Quezon City.