Opisyal nga giila sa Guinness World Records ang usa ka 33-anyos nga Malaysian nga si Prathab Muniandy human nakit-an nga aduna kiniy kinatibuk-ang 42 ka ngipon sa iyang baba.
Kini mas daghan og napulo (10) kung itandi sa normal nga 32 ka ngipon sa usa ka hamtong nga tawo. Sumala ni Muniandy, niadtong 2021 pa niya namatikdan ang maong talagsaong kahimtang atol sa usa ka panagtapok sa pamilya. Pag-abot sa tuig 2023, nakumpirma nga niabot na sa 42 ang iyang mga ngipon, apan bisan pa sa kadaghan niini, wala kini naghatag og bisan unsang komplikasyon o kasakit kaniya.
Tungod niini, siya na karon ang naghupot sa titulong “Most teeth in a person’s mouth (male).” Samtang sa mga babaye, ang rekord gihuptan gihapon ni Kalpana Balan nga adunay 38 ka ngipon.