MALAYBALAY CITY – Hugot ang pagpatuman sa seguridad sa mga byahedor sa dakbayan sa Malaybalay atol sa Oplan Undas 2025 nga gi-lunsad sa Land Transportation Office (LTO) inubanan sa mga personahe sa Traffic Management Center (TMC) ug sa Philippine National Police (PNP).
Ang operasyon gisugdan niadtong Lunes ug magpadayon hangtod sa Nobyembre 4, diin naglangkob kini sa inspeksyon sa mga bus, van, motorsiklo ug mga dokumento sa mga drayber aron masiguro nga kompleto sa papeles ug luwas sa biyahe ang mga pasahero ug sakyanan.
Sa eksklusibong pakighinabi sa Bombo Radyo Malaybalay kay Henry Cavan, LTO Inspector nga ang ilang daily inspection magsugod kada alas 6:00 sa buntag hangtod alas 9:00 sa gabii ilabi na karong semanaha nga gilauman ang pagdagsa sa mga pasahero nga mopauli sa nagkadaiyang lungsod ug probinsya.
Dugang pa niini, lakip sa ilang gibantayan ang mga sementeryo aron motabang sa kapulisan sa pagpangandam sa kalinaw ug kahapsay sa pag-obserba sa Undas 2025.
Ang Oplan Undas 2025 kabahin sa nationwide monitoring and assistance program nga tuyo makasigurong luwas ang publiko karong panahon sa Undas.