Walay nadawat nga pormal nga komunikasyon ang buhatan sa Malaybalay City Water District gikan sa mga tigdumala sa Northern Mindanao Regional Athletics Association (NMRAA).
Sa exclusibong pakighinabi sa Bombo Radyo kay Engr. Nolito S. Binahon, General Manager sa MCWD kinsa nag-ingon nga nakadungog lamang sila mahitungod sa maong dakong kalihokan pinaagi sa mga impormal nga istorya sa ubang mga opisyal. Matud ni Binahon, walay pormal nga diskusyon nga gihimo tali sa MCWD ug sa mga nag-organisa sa NMRAA aron plantsahon ang suplay sa tubig sa dapit diin ipahigayon ang mga dula.
Ang maong kakuwang sa koordinasyon gilaumang maghatag og hagit tungod kay ang Bukidnon Sports Complex nga nahimutang sa Brgy. Laguitas, nakasinati na daan og hinay nga pressure sa tubig. Base sa monitoring sa MCWD, lisod paagason ang linya paingon sa maong complex, butang nga nasinati na niadtong Marso sa miaging tuig bisan pa man sa ilang paningkamot sa pagbutang og linya alang niini.
Bisan pa man niini, gipasalig sa MCWD nga andam silang muhatag og dinalian nga tabang kon pananglitan manginahanglan og suplay ang mga atleta ug opisyal sa higayon nga magsugod na ang programa. Giawhag sa buhatan ang lokal nga kagamhanan ug ang mga tigdumala sa complex sa pagsangpit sa ilang atensyon kon adunay mahitabong water interruption aron mapangitaan kini og dinalian nga solusyon.