Nakab-ot sa Sangguniang Panglungsod sa Malaybalay ang pagkasulod sa Top 3 sa Northern Mindanao sa Local Legislative Award, human giila sa rehiyon ang dako’g epekto sa mga napasarang ordinansa sa katawhan.
Gikonpirma ni Vice Mayor Estelito R. Marabe nga ang ika-9 nga Sangguniang Panglungsod nakadaog una sa Bukidnon, ug misulod dayon sa regional ranking, diin Oroquieta City ug Gingoog City lamang ang nakauna.
Gipunting sa opisyal nga gibasehan sa award ang mga ordinansa nga nakahatag og impluwensya sa agrikultura, panginabuhi, proteksyon sa katawhan panahon sa kalamidad ug COVID-19, lakip ang uban pang serbisyo publiko.
Gisaysay niini nga ang maong kadaugan resulta sa panaghiusa sa konseho ug sa opisina sa Mayor, ilabina sa pagdali sa mga ordinansa, resolusyon ug paghatag og otoridad sa Mayor aron dali maipatuman ang mga proyekto.
Gilauman ni Marabe nga magpadayon ang maayong performance sa Konseho aron mas mapaayo ang serbisyo publiko ug mapadayon ang pagpatunhay sa kadaugan sa dakbayan.