Gitan-aw sa Malacañang nga tsismis ang mga dokumento nga gipagawas ni Cong. Leandro Leviste kabahin sa 2025 budget sa Department of Public Works and Highways (DPWH).
Sumala sa mambabalaod, nakuha ni Leviste ang mga dokumento gikan sa namatay nga kanhing DPWH undersecretary nga si Maria Catalina Cabral.
Sumala ni Palace Press Officer Claire Castro, dili tubagon sa Palasyo ang sulod sa mga dokumento hangtod kini mapamatud-an ug ma-authenticate mismo sa DPWH.
Ang pulong ni Castro nagpasabot nga ang Palasyo naghulat sa pormal nga kumpirmasyon gikan sa ahensya sa DPWH aron masiguro nga lehitimo ug tinuod ang mga impormasyon.
Gidugang pa niya nga bisan unsang impormasyon nga wala’y opisyal nga pag-validate sa DPWH, lakip na ang mga dokumento nga gigunitan ni Leviste, mabutang lamang nga hearsay o tsismis nga walay probative value.
Ang maong pahayag gisulti human miingon si Leviste nga adunay pipila ka Cabinet officials nga makita sa mga dokumento nga nakuha niya gikan sa namatay nga DPWH Undersecretary Maria Catalina Cabral.
Gidugang pa ni Leviste nga ang mga rekord naglangkob dili lang sa mga mambabalaod apan apil usab ang mga senior officials gikan sa ubang ahensya, mga personalidad sa pribadong sektor, ug mga indibidwal nga dili miyembro sa gobyerno.