Gipasalig sa Malacañang nga magpabiling lig-on ug walay kausaban ang presyo sa mga nag-unang palitonon sa nasud hangtod sa Abril 16, 2026.
Kini human sa malampusong pakig-alayon sa Department of Trade and Industry (DTI) ngadto sa mga dagkong manufacturers.
Matud pa ni Palace Press Officer Undersecretary Claire Castro nga kining maong kasabutan kabahin sa programang Unified Package for Livelihoods, Industry, Food, and Transport (UPLIFT) sa administrasyong Marcos Jr.
Gipasalig sa gobyerno ang senemanang pag-monitor sa mga presyo pinaagi sa buhatan ni Secretary Cris Roque aron masiguro nga matuman ang kasabotan.
Magpadayon usab ang pakigpulong sa mga manufacturers aron mapugngan ang kalit nga pagsaka sa presyo sa mga palaliton.
Samtang gipasalig ni Presidente Ferdinand “Bongbong” Marcos Jr. nga naghimo na og dinaliang mga lakang ang kagamhanan aron mapugngan ang pagmahal sa presyo sa pagkaon taliwala sa walay hunong nga pagsaka sa presyo sa lana sa nasud.
Matud ni Marcos, prayoridad sa gobyerno nga dili maapektuhan ang batakang panginahanglan sa mga pamilyang Pilipino sa matag higayon nga adunay lihok sa presyo sa petrolyo.