Gipaniguro sa Malacañang nga dili maapektohan ang pagdumala ug adlaw-adlaw nga trabaho ni Presidente Ferdinand Marcos Jr. bisan pa sa sayong pag-anunsyo ni Bise-Presidente Sara Duterte sa planong pagdagan isip Presidente sa 2028 Presidential Elections.
Sumala kang Palace Press Officer Usec. Claire Castro, nagpabiling konsentrado ang Presidente sa pagtuman sa mandato, hilabina sa pagpalig-on sa ekonomiya sa nasud, pagpausbaw sa panginabuhian sa mga Pilipino, ug pagsolusyon sa problema sa baha.
Gimatud-an ni Castro, nga dili angay maapektohan ang operasyon sa gobyerno sa mga pamahayag ug politikal nga plano ni bise-Presidente Duterte, ug gikaingong wala na’y panginahanglan nga tubagon pa sa Presidente ang pipila ka pamahayag niini tungod klaro na matud pa nga mga fake news kini.
Samtang, wala usab maghatag og komento ang Malacañang kabahin sa posibleng motibo sa Bise-Presidente sa sayong pag-anunsyo sa pagdagan.
Sa dihang gipangutana si Castro mahitungod sa rason niini, mitubag kini nga ang Bise-Presidente lamang ang makatubag sa maong pangutana, gumikan wala matud pa kini kahibalo sa hunahuna niini.
Gipadayag usab ni Castro, nga wala pa nahisgutan sa Presidente ang bisan unsang posibleng politikal nga alyansa, tungod labing sayo pa aron hisgutan ang eleksyon ug gikaingong mas daghan pang mas importante nga isyu ang angay tutokan sa gobyerno karon kaysa sa pangampanya.