Hugot nga gipanghimak sa Malacañang ang mga pasangil sa pipila ka mambabalaod nga adunay personal nga kahibalo si Pangulong Ferdinand “Bongbong” Marcos Jr. kalabot sa giingong “kickback” o ilegal nga komisyon gikan sa mga flood control projects sa nasud.
Sa gipahigayon nga press briefing niadtong Biyernes, Pebrero 13, 2026, giklaro ni Palace Press Officer Undersecretary Claire Castro nga walay kamatuoran ang mga akusasyon nga nalambigit ang Presidente sa maong anomaliya.
Gitawag sa Palasyo nga usa ka “bakak” ang maong mga report nga tuyo lang nga dauton ang dungog sa Pangulo. Kini nga reaksyon sa Malacañang mitumaw human migawas ang mga report bahin sa giingong mga text messages nga nagkonektar sa Presidente ngadto sa maong mga ilegal nga transaksyon.
Matod pa ni Castro, mas nakatutok karon ang Pangulo sa pagpauswag sa ekonomiya ug sa pagserbisyo sa katawhan. Gidugang usab sa Palasyo nga pasagdan ang mga ahensya sa gobyerno ug ang korte sa paghimo og saktong imbestigasyon aron manubag ang mga sad-an.