Gikondena sa Makabayan bloc sa Kamara ang giingong military strike sa Estados Unidos batok sa Venezuela nga, sumala sa grupo, misangpot sa pagkadakop ni Venezuelan President Nicolas Maduro.
Matod nila, ang maong aksyon usa ka grabeng paglapas sa soberanya sa Venezuela ug sa internasyonal nga balaod. Sa usa ka hiniusang pamahayag, gihulagway sa mga representante sa ACT Teachers, Gabriela, ug Kabataan Partylist ang maong aksyon isip usa ka klarong paglapas sa soberanya ug internasyonal nga balaod.
Gitawag pa sa grupo ang maong pagdakop nga usa ka matang sa “state-sponsored terrorism” nga makamugna og dakong kagubot sa Latin America ug sa tibuok kalibutan.
Gipahayag sa Makabayan nga kinahanglang buhian dayon si Maduro ug hunongon na sa Amerika ang pagpanghasi sa mga nasod nga adunay kaugalingong baroganan.
Nanawagan usab sila sa Department of Foreign Affairs (DFA) nga dili magpadala sa dikta sa Amerika ug ipatigbabaw ang kalinaw pinaagi sa United Nations.