Padayon ang search and retrieval operations sa gikatahong magtiayon nga sakay sa bao-bao nga nahulog atol sa nahitabong landslide ug pagkahugno sa Bukidnon-Davao Road sa Overview, Sitio Kipolot, Brgy. Palacapao, Quezon, Bukidnon.
Giila ang mga gikatahong missing victims nga sila si Ely Ubatay ug Thelma Ubatay, residente sa Purok 9, Kahusayan, Kitaotao, Bukidnon Ang duha gikaingong nagsakay sa usa ka bao-bao nga natabunan sa yuta atol sa pagkahugno sa kalsada kagabii, Oktubre 18, 2025, pasado alas-9 sa gabii.
Sa kasamtangan, nakita na ang mao nga bao-bao, apan padayon ang pagpangita sa mga otoridad sa mga sakay niini.
Nagpadayon usab ang koordinasyon sa mga otoridad alang sa pagtan-aw sa posibilidad nga ablihan ang alternatibong access road.
Base usab sa abiso sa DPWH, temporaryo nga dili paagian ang Bukidnon-Davao Road sa Sitio Kipolot tungod sa hulga sa posibleng pagdahili sa sa yuta.
Gisugyot usab ang mosunod nga alternatibong ruta: alang sa mga heavy vehicles o trucks, Maramag (via Camp One) – Damulog – Carmen – Kabacan – Matalam – Kidapawan – Bansalan – Digos City; ug alang sa mga light vehicles sama sa private cars ug buses, Valencia City – San Fernando – Talaingod – Kapalong – Tagum City/Panabo City.
Sumala sa DPWH Region 10, temporaryo nga ipasira ang maong kalsada alang sa tanang klase sa sakyanan aron mapanalipdan ang kaluwasan ug seguridad sa mga biyahedor samtang nagpadayon ang clearing ug retrieval operation sa lugar.