Gitay-og sa magnitude 5.9 nga linog ang Sarangani Island sa Davao Occidental alas-6:34 sa gabii Sabado, Abril 4.
Sumala sa Philippine Institute of Volcanology and Seismology kon PHIVOLCS, nabati ang linog sa lain-laing lugar sa Mindanao, diin natala ang Intensity III sa Dakbayan sa General Santos samtang ang instrumental intensities o kusog sa linog base sa instrumento, natala ang Intensity III sa lungsod sa Malungon sa Sarangani.
Samtang Intensity II ang nabati sa M’lang sa Cotabato, Digos City sa Davao del Sur, Jose Abad Santos sa Davao Occidental, ug sa mga lungsod sa Malapatan ug Kiamba sa Sarangani.
Nabati usab ang maong kusog sa T’boli, Santo Niño, ug Tupi sa South Cotabato; Palimbang sa Sultan Kudarat; ug usab sa General Santos City.
Intensity I ang natala sa pipila ka bahin sa Bukidnon, Cotabato, Davao del Sur, Davao Occidental, Davao de Oro, Misamis Oriental, Sarangani, South Cotabato, Zamboanga City, ug Davao City.
Sa pagkakaron, wala pay natala nga dakong kadaot o namatay tungod sa linog.
Bisan pa niini, gipasidan-an ang publiko sa posibleng aftershocks, busa gitambagan ang tanan nga magpabiling alerto ug mosunod sa mga pahimangno sa mga otoridad.