Patay sa aksidente ang usa ka mag-uuma, human makuryentihan samtang nag-ayo sa guba nga electrical wire sa usa ka fishpond.
Ang insidente nahitabo pasado alas-10:30 sa buntag, kagahapong adlawa sa Purok 4, Barangay Kalasungay. Base sa imbestigasyon sa kapulisan, ang biktima, 49 anyos, minyo, residente sa maong lugar, nakita nga naglutaw sa fishpond samtang nagkupot sa electrical wire.
Ang kamatayon nadiskubrehan sa igsuon sa biktima, diin nakit-an usab ang mga samad sa kamot nga posibleng timailhan sa electric shock.Gipasabot sa pulisya nga ang biktima misulay pag-ayo sa guba nga linya sa kuryente nga nagresulta sa kamatayon.
Gipahimangnoan sa kapulisan ug lokal nga awtoridad ang publiko nga magmatngon sa pagtrabaho duol sa mga kable sa kuryente, dayun ipahibalo sa mga eksperto kon adunay guba aron malikayan ang susamang disgrasya.